洛基客 Rockyhard- 我的野蠻顧客龍虎榜
|
好在老編格外開恩，終於比小弟我手寫我口，除粗口如「狗嗡」D另類發音外，廣東口語、俗語、潮語、網語都用得，立即覺得天空海闊，任我飛翔，自由哂! |
|
| 3/6/2009 |
野蠻女友，後生仔緊有番件，唔係又點可以同巴打吹水，但係有關佢地嘅私隱，公開講唔通未死過，不如講野蠻顧客吐吓苦水，由於公司老闆錢有幾多就唔知，性格就大把，向來唔 buy 顧客永遠是對的果一套，話一次斷尾好過餐餐比人屈機，又蝕錢又勞氣，留番啖氣同D時間服侍好D好客戶仲實際，仲可以保留番DD尊嚴同埋專業形象，又幾啱聽，唔怪D同事人工咁（奀）都做咁耐。
|
| 3/6/2009 |
講番野蠻顧客龍虎榜，全部排名唔分先後，話明有時唔係我經手，只係耳聞目見，有時仲係客戶報料，但可信性都有番咁上下先至講，呢D客幫趁細眉細眼但超麻煩，大老們D網誌都費事講。 |
野蠻顧客龍虎榜1 - 無敵奪命金較剪
3/6/2009
第一個印像深刻嘅係「無敵奪命金較剪」，呢個阿姐（其實似阿嬋多D)三
唔識七走黎認係行家，話要用批發價同我地買幾把剪彩用嘅金較剪， 咁一次生，兩次熟，三次都可以未係大結局架，我地唔識唔係罪，咪好心借辨俾佢，交個客睇過
無問題，至番轉頭落柯打囉，一把都係幾兜野，批發幾把每把賺幾個都唔夠俾速遞，似幫人多過做生意，點知佢收貨後番黎要退貨，話較剪唔夠利，唔似裁衫用嘅較
展一剪剪到尾，竟要求換到啱佢要求為止，揀極唔夠數，結過同事話退番晒D錢收番D貨算數，佢竟然出動報警呢招，警察哥哥都唔明佢搏乜，又唔知較剪邊度唔妥，又話要貨唔要錢，但又話貨唔啱佢，係人都知鍍咗金嘅禮儀較剪緊係無裁衫剪咁利，條絲帶唔好用天蠶絲咁韌嘅咪得囉，見到警察哥哥唔多幫佢，又話報消委會，唔通消委會改咗政策，唔單止幫消費者，仲幫埋商業客，而且退款都唔得，仲要額外賠償損失，同唔成功唔收費嗰D索償律師爭生意，結果警察哥哥做好做丑勸咗佢收錢走人．然後跟負責同事同埋係側邊做定旁觀證人嘅管理員一齊苦笑。
| 4/6/2009 老編 「君子絕交，不出惡聲」，小伙子吐苦水紓壓殊堪體諒，惟緊記分寸，莫作人身攻擊。 今日巧言令色者當道，創意工業之不良銷售手法猶具創意，少一個無理顧客，絕非公司所失，相反，無理顧客失去一個較負責任之供應商是自家損失，以為自己精明 算盡天下人的無理顧客就由他跟無良商人糾纏算了，往後無須屈服於無理顧客之要求，反減少無謂消耗，劉德華先生跟旅發局是否看到事實之另一面。 |
